សាររបស់ប្រធានក្រុមប្រឹក្សាភិបាល
លោក BRINDLEY DE ZYLVA
ប្រធានក្រុមប្រឹក្សាភិបាល
សេដ្ឋកិច្ចសាកល បានបន្តងើបឡើង ប៉ុន្តែក្នុងល្បឿនយឺតជាងឆ្នាំមុន ដោយសារការអូសបន្លាយនៃសង្រ្គាមរុស្សី-អ៊ុយក្រែន ការរឹតបន្តឹងនយោបាយរូបិយវត្ថុនៅប្រទេសអភិវឌ្ឍចម្បងៗ និងការកើនឡើងភាពតានតឹងភូមិសាស្ត្រ នយោបាយនៅមជ្ឈិមបូព៌ា។ តាមការព្យាកររបស់មូលនិធិរូបិយវត្ថុអន្តរជាតិ កំណើនសេដ្ឋកិច្ចពិភពលោកនៅ ឆ្នាំ២០២៣ អាចសម្រេចបានក្នុងអត្រា ៣% ធៀបនឹង ៣,៥% នៅឆ្នាំមុន ដែលក្នុងនោះសេដ្ឋកិច្ចប្រទេសអភិវឌ្ឍកើន ១,៥% ប្រទេសកំពុងលូតលាស់និងកំពុងអភិវឌ្ឍកើន ៤% និងសេដ្ឋកិច្ចតំបន់អាស៊ានកើន ៤,៤%។ ទន្ទឹមនឹងនេះ អតិផរណាពិភពលោកបានថយចុះពី ៨,៣% នៅឆ្នាំ២០២២ មកត្រឹម ៦,៥% ប៉ុន្តែបន្តមានអត្រាខ្ពស់ជាងកម្រិត គោលដៅ ដែលធ្វើឱ្យធនាគារកណ្តាលអាចបន្តអនុវត្តនយោបាយរូបិយវត្ថុរឹតបន្តឹងបន្ថែមទៀត។
សេដ្ឋកិច្ចកម្ពុជា ត្រូវបានប៉ាន់ស្មានថាបន្តងើបឡើងក្នុងអត្រា ៥,៥% ខ្ពស់ជាងឆ្នាំមុនបន្តិច (៥,២%) ដែលគាំទ្រជា ចម្បងដោយកំណើនវិស័យទេសចរណ៍ និងផលិតផលកម្មន្តសាលមិនមែនកាត់ដេរ បើទោះបីជាវិស័យកាត់ដេរ សំណង់ អចលនទ្រព្យ និងកសិកម្មមានកំណើនទាបក៏ដោយ។ វិស័យទេសចរណ៍បានកើនឡើងជាលំដាប់ និងបាន ចូលរួមចំណែកជំរុញការងើបឡើងនៃសកម្មភាពសេដ្ឋកិច្ចក្នុងស្រុកដែលពាក់ព័ន្ធ ដូចជា ការដឹកជញ្ជូន ពាណិជ្ជកម្ម និងទូរគមនាគមន៍ ជាដើម។ ការនាំចេញផលិតផលមិនមែនកាត់ដេរ ដូចជា គ្រឿងអេឡិចត្រូនិក គ្រឿងបន្លាស់រថយន្ត និងបន្ទះសូឡាទទួលបានកំណើនល្អ ខណៈដែលការនាំចេញសម្លៀកបំពាក់និងស្បែកជើង បានទទួលរងផលប៉ះពាល់ ពីការធ្លាក់ចុះតម្រូវការនៃប្រទេសដៃគូពាណិជ្ជកម្មចម្បងៗ ជាពិសេស សហភាពអឺរ៉ុប និងសហរដ្ឋអាមេរិក។ វិស័យ សំណង់ទទួលបានកំណើនទាប ដែលជាចម្បងត្រូវបានជំរុញដោយការវិនិយោគ និងការអភិវឌ្ឍហេដ្ឋារចនាសម្ព័ន្ធ សាធារណៈ ខណៈដែលការវិនិយោគបរទេស នៅក្នុងវិស័យអចលនទ្រព្យ បានថយចុះ។ វិស័យកសិកម្មបានកើនឡើង បន្តិច ដែលគាំទ្រដោយកំណើនតម្រូវការក្រៅប្រទេស និងភាពអំណោយផលនៃកត្តាអាកាសធាតុ។ ចំណែកឯអត្រា អតិផរណាកម្ពុជាបានថមថយមកកម្រិតជាមធ្យម ២,១% នាឆ្នាំ២០២៣ ពី ៥,៤% នាឆ្នាំ២០២២ ដោយសារការធ្លាក់ ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈ និងការថយល្បឿននៃកំណើនថ្លៃម្ហូបអាហារ នេះបើយោងតាម របាយការណ៍ប្រចាំឆ្នាំ២០២៣ ដែលចេញដោយធនាគារជាតិនៃកម្ពុជា។
អិលអូអិលស៊ី បានអនុវត្តប្រតិបត្តិការប្រកបដោយការប្រុងប្រយ័ត្ន ដើម្បីធានានូវគុណភាព និងនិរន្តរភាព។ អតិថិជន ដែល ប្រាក់ចំណូលបានរងផលប៉ះពាល់ពីកូវីដ១៩និងគ្រោះទឹកជំនន់ នៅមិនទាន់ទទួលបានប្រាក់ចំណូលពេញលេញនៅឡើយទេបើប្រៀបធៀប ទៅនឹងស្ថានភាពមុនកូវីដ១៩។ ជាមួយនឹងការគាំទ្រផ្នែកបទបញ្ញត្តិពីធនាគារជាតិនៃកម្ពុជា អិលអូអិលស៊ី (ខេមបូឌា) អាចបន្តផ្តល់ការអនុគ្រោះដល់អតិថិជន តាមរយៈការផ្តល់រយៈពេលអនុគ្រោះដល់ពួកគាត់ ដើម្បីឱ្យពួកគាត់មានពេលវេលាក្នុងការចាប់ផ្តើមអាជីវកម្មឡើងវិញ ជាពិសេសក្នុងវិស័យទេសចរណ៍។
ក្នុងយុគសម័យឌីជីថល ប្រជាជនបានបង្កើនតម្រូវការក្នុងការប្រើប្រាស់សេវាហិរញ្ញវត្ថុឌីជីថល(DFS)។ ទន្ទឹមនឹងនេះ អិលអូអិលស៊ីបានសម្របខ្លួនយ៉ាងឆាប់រហ័សទៅនឹងការប្រើប្រាស់សេវាហិរញ្ញវត្ថុតាមបែបឌីជីថល និងបានផ្តល់ជូននូវ ដំណោះស្រាយធនាគារឌីជីថលយ៉ាងសម្បូរបែប ដើម្បីបំពេញតាមកំណើននៃតម្រូវការរបស់អតិថិជន ដែលរួមមាន កម្មវិធីធនាគារចល័ត iPay Mobile Banking Application ដែលផ្តល់មុខងារកាន់តែប្រសើរជាងមុនក្នុងការធ្វើ ប្រតិបត្តិការសេវាធនាគារតាមអ៊ីនធើណែត សេវាទូទាត់សងប្រាក់តម្លៃរាយ (RFT) សេវាទូទាត់រហ័ស (FAST) និង ប្រព័ន្ធបាគង ជាដើម។ តាមរយៈបណ្តាញធនាគារឌីជីថលទាំងនេះ អតិថិជនរបស់យើងអាចធ្វើប្រតិបត្តិការធនាគារ ដោយខ្លួនឯងយ៉ាងងាយស្រួលពីទូរសព្ទដៃ បានគ្រប់ពេលវេលា ដោយពុំចាំបាច់ធ្វើដំណើរទៅធ្វើប្រតិបត្តិការនៅ ការិយាល័យសាខា។ ចាប់តាំងពីឆ្នាំ២០២២ អិលអូអិលស៊ីបានដាក់ឱ្យប្រើប្រាស់នូវប្រព័ន្ធធនាគារតាម Tablets សម្រាប់បុគ្គលិកនៅសហគមន៍ ដែលបង្កើនផលិតភាពការងារ និងកាត់បន្ថយការងារដោយដៃ រួមមានការ វាយតម្លៃប្រាក់កម្ចី ការប្រមូលប្រាក់កម្ចី និងការបើកគណនីបញ្ញើសំចៃ។ អិលអូអិលស៊ីនឹងបន្តកែលម្អសេវាហិរញ្ញវត្ថុ ឌីជីថលឱ្យកាន់តែល្អប្រសើរជាលំដាប់ និងទាន់សម័យកាល ដើម្បីផ្តល់នូវបទពិសោធន៍ដ៏ល្អប្រសើរជូនដល់អតិថិជន។
យើងកំពុងរៀបចំយុទ្ធសាស្រ្តក្នុងការប្រើប្រាស់ប្រព័ន្ធអេកូឌីជីថល ដែលមានការវិវត្តយ៉ាងឆាប់រហ័សនៅក្នុងប្រទេស កម្ពុជា ដើម្បីផ្តល់លទ្ធភាពឱ្យសហគ្រិនខ្នាតមីក្រូអាចផ្លាស់ប្តូរពីការប្រើប្រាស់សេវាហិរញ្ញវត្ថុក្រៅផ្លូវការ មកប្រើប្រាស់ សេវាហិរញ្ញវត្ថុផ្លូវការ។ បច្ចុប្បន្ន អិលអូអិលស៊ីកំពុងផ្តល់សេវាដល់សហគ្រិនខ្នាតមីក្រូប្រមាណ ២៦០.០០០ នាក់ (៦៦% នៃអតិថិជនសរុប) ដែលក្នុងនោះ ៧០% ជាស្រ្តីដែលភាគច្រើនមកពីតំបន់ជនបទនៃប្រទេសកម្ពុជា។ កម្ចីដល់ សហគ្រិនខ្នាតមីក្រូរួមចំណែកត្រឹមតែ ២០% នៃផលប័ត្រឥណទានសរុប ដែលក្នុងនោះ ៨១% នៃគណនីកម្ចីមិនមាន ដាក់អចលនទ្រព្យជាទ្រព្យធានា។ ទំហំឥណទានជាមធ្យមសម្រាប់កម្ចីខ្នាតមីក្រូមានចំនួនត្រឹមតែ ៩៦៥ ដុល្លារ អាមេរិក។ កម្ចីដល់សហគ្រិនខ្នាតតូច មធ្យម និងធំ ដែលរួមចំណែក ៨០% នៃផលប័ត្រឥណទានសរុបបានរួម ចំណែកយ៉ាងធំក្នុងការគាំទ្រដល់វិស័យខ្នាតមីក្រូ ដែលបានជួយយើងក្នុងការបន្តផ្តល់នូវបរិយាបន្នសម្រាប់ម៉ូដែល អាជីវកម្មរបស់យើង។
នៅឆ្នាំបន្តបន្ទាប់ខាងមុខនេះ អិលអូអិលស៊ី (ខេមបូឌា) នឹងបន្តកែលម្អ និងពង្រីកសេវាហិរញ្ញវត្ថុឌីជីថលរបស់ខ្លួន ព្រមទាំងអភិវឌ្ឍផលិតផលដែលត្រូវបានរចនាឡើងដើម្បីបំពេញតាមតម្រូវការអាជីវកម្មរបស់អតិថិជន។ ទន្ទឹមគ្នានេះផង ដែរ អិលអូអិលស៊ីនឹងបន្តពង្រីកសកម្មភាពសង្គម ការយល់ដឹងផ្នែកហិរញ្ញវត្ថុ និងសកម្មភាពដែលជួយគាំទ្រដល់បរិស្ថាន សង្គម និងអភិបាលកិច្ចល្អ ដើម្បីឱ្យសមស្របទៅតាមតម្រូវការអាជីវកម្មដែលកំពុងតែរីកចម្រើន។
គណៈគ្រប់គ្រង និងបុគ្គលិកអិលអូអិលស៊ីបានបង្ហាញនូវភាពរឹងមាំ និងសមត្ថភាពក្នុងការសម្របខ្លួនទៅនឹងការផ្លាស់ ប្តូរនៃម៉ាក្រូសេដ្ឋកិច្ច និងផលលំបាកនានា ទន្ទឹមគ្នានឹងការធានាបាននូវអនុលោមភាពលើរាល់ច្បាប់ និងបទបញ្ញត្តិ ទាំងឡាយ។ អិលអូអិលស៊ី (ខេមបូឌា) អនុលោមតាមរាល់បទបញ្ញតិ្ត និងអនុបាតដ៏រឹងមាំ ដែលចេញដោយ ធនាគារជាតិនៃកម្ពុជា។ យើងនឹងបន្តរក្សានូវគោលដៅអភិវឌ្ឍប្រកបដោយចីរភាព ដើម្បីធានាបាននូវនិរន្តរភាពដ៏យូរ អង្វែងរបស់ក្រុមហ៊ុន។
ជាចុងក្រោយខ្ញុំបាទសូមថ្លែងអំណរគុណដ៏ជ្រាលជ្រៅ ដល់អ្នកដែលពាក់ព័ន្ធទាំងអស់រួមមាន អតិថិជន វិនិយោគិន និយ័តករធនាគារ និងដៃគូម្ចាស់កម្ចីទាំងក្នុង និងក្រៅប្រទេសសម្រាប់ការជឿជាក់ ការជឿទុកចិត្ត និងការគាំទ្រចំពោះការរីកចម្រើនរបស់ អិលអូអិលស៊ី ក្នុងរយៈពេលប៉ុន្មានឆ្នាំកន្លងទៅនេះ។
ខ្ញុំបាទក៏សូមកោតសរសើរចំពោះក្រុមប្រឹក្សាភិបាលទាំងអស់សម្រាប់ការណែនាំ និងការគាំទ្រក៏ដូចជាចំពោះបុគ្គលិក អិលអូអិលស៊ី ទាំងអស់ដែលស្ថិតនៅក្រោមការដឹកនាំរបស់គណៈគ្រប់គ្រងដែលមានសមត្ថភាព និងការប្តេជ្ញាចិត្តសម្រាប់ការខិតខំប្រឹងប្រែងក្នុងការបំពេញការងារបានយ៉ាងល្អ។
យើងសូមបញ្ជាក់ពីការប្តេជ្ញាចិត្តរបស់យើងចំពោះអតិថិជន និងភាគទុនិកទាំងអស់របស់យើងថា នៅឆ្នាំ២០២៤ យើងនឹង បន្តផ្តោតសំខាន់លើវិស័យដែលផ្តល់នូវឱកាសដ៏ល្អបំផុតសម្រាប់អិលអូអិលស៊ី (ខេមបូឌា) និងគាំទ្រអាជីវកម្មដែលមាន ភាពធន់ ដោយប្រកាន់ខ្ជាប់ជានិច្ចនូវទំនួលខុសត្រូវរបស់យើងក្នុងការការពារបរិស្ថាន និងសង្គម។
អិលអូអិលស៊ី (ខេមបូឌា) ភីអិលស៊ី បានបម្រើដល់សាធារណជន និងសង្គមកម្ពុជា អស់រយៈពេលជាង២៩ឆ្នាំមកហើយ ហើយក៏ត្រូវបានទទួលស្គាល់ពីស្ថាប័នហិរញ្ញវត្ថុជាតិ និងអន្តរជាតិផងដែរ។ ផលិតផល និងសេវាកម្មរបស់យើង ត្រូវបានបង្កើតឡើងដើម្បីសម្រួលដល់ជីវភាពរស់នៅរបស់អតិថិជនកម្ពុជា។
អាស័យដា្ឋន៖ អគារលេខ ៦៦៦B ផ្លូវលេខ ២៧១ ភូមិក្បាលទំនប់១ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ព្រះរាជាណាចក្រកម្ពុជា
 ទូរស័ព្ទ៖ (+៨៥៥) ២៣ ៩៩១ ៩៩១  សារអេឡិចត្រូនិច៖ [email protected] |
     
|